Silent Observation: From Alhadpan to Awareness
From Alhadpan to Awareness Ye wahi haath hain, Jo kabhi chewing gum ko kheench kar, Hawa mein taar banaya karte the. Aaj wahi haath, Usi chewing gum ko paper mein lapet kar, Dustbin tak chhod aate hain. Chewing gum wahi hai, Chaabna abhi bhi jaari hai, Bas tareeka badal gaya hai. Kal tak jo deewaron par lakeerein kheechte the, Aaj copy ke haashiye par doodle banate hain. Jo zor-zor se has kar class ko hila dete the, Aaj muskurahat mein baat kehna seekh gaye hain. Jo zameen par wrappers phenk dete the, Aaj jeb mein rakh kar dustbin dhoondhte hain. Jo ek dusre ki baat kaat dete the, Aaj "sun toh lo" kehna seekh gaye hain. Tum badal rahe ho... Bahut dheere, par badal rahe ho. Ek din yahi chewing gum khareedne se pehle, Tum sochoge - zarurat hai bhi ya nahi? Ek din iske liye waqt hi nahi hoga. Aur tab samjhoge, Sabhya hona ek din ka kaam nahi, Ye roz, thoda-thoda banta hai. Tum abhi safar mein ho, Aur mujhe tum par fakra hai.